အကုန်လုံးရဲ့တစ်ဝက်ကို ပိုင်သလား

မြန်မာပြည်မှာ အများစုက “လင်ပိုင်တဲ့ ပစ္စည်းကို မယားဖြစ်သူက တစ်ဝက်ပိုင်ဆိုင်ပြီး၊ မယားဖြစ်သူရဲ့ ပစ္စည်းကို လင်က တစ်ဝက်ပိုင်ဆိုင်တယ်” ဆိုပြီး အမှတ်မှားနေကြတယ်။ တကယ်တော့ လင်မယား ဖြစ်ပြီးနောက် လက်ထက်ပွား ပစ္စည်းတွေကိုသာ တစ်ယောက်တစ်ဝက် ပိုင်ဆိုင်ခွင့် ရှိကြပြီး၊ လင်မယား မဖြစ်ခင်တုန်းက ရှိခဲ့တဲ့ ကိုယ့်အိမ်ထောင်ဖက် ပိုင်ဆိုင်တဲ့ ပစ္စည်းတွေကိုတော့ တစ်ဝက်ပိုင်ဆိုင်ချင်လို့ မရပါဘူး။

ကိုယ့်အိမ်ထောင်ဘက်ရဲ့ ပစ္စည်းတွေကို ဘယ်အချိန်မှာ အပြည့်အဝ ပိုင်ဆိုင်ခွင့် ရှိသလဲဆိုရင် မြန်မာဓလေ့ထုံးတမ်းဥပဒေအရ လင်မယားနှစ်ဦးထဲက တစ်ယောက်ယောက် ကွယ်လွန်ချိန်မှာ ကျန်ရစ်ခဲ့တဲ့ အိမ်ထောင်ဖက်က ကွယ်လွန်သူရဲ့ ပစ္စည်းများကို အမွေအဖြစ် အပြည့်အဝ ရရှိခြင်း ဖြစ်တယ်။

A&D Myanmar Legal Services

“ရေအဆုံး၊ ကုန်းတစ်ဝက်” လား

မြန်မာပြည်မှာ လူအများ ပြောလေ့ရှိတဲ့ စကားတွေထဲမှာ “ရေအဆုံး၊ ကုန်းတစ်ဝက်” ဆိုတဲ့ စကားလည်းပါတယ်။ ဒီစကားအရဆိုရင် ရေထဲမှာ ပစ္စည်းတစ်ခုခု တွေ့လို့ရှိရင် တွေ့တဲ့ပစ္စည်းက တွေ့တဲ့သူ အပိုင်ဖြစ်ပြီး၊ ကုန်းပေါ်မှာ ပစ္စည်း ကောက်ရလို့ရှိရင် ကောက်ရသူနဲ့ မူလပစ္စည်းပိုင်ရှင်တို့ တစ်ယောက်တစ်ဝက် ပိုင်ဆိုင်ကြတယ်လို့ အဓိပ္ပာယ် ရတယ်။ တကယ်ရော ဒီလိုဟုတ်ရဲ့လား။

ဥပဒေအရကတော့ ကောက်ရသောပစ္စည်း၏ ပိုင်ရှင်ဖြစ်ကြောင်းသိလျက်နဲ့ ပြန်ပေးရန် ငြင်းဆန်ရင် မရိုးမဖြောင့်သော သဘောဖြင့် မိမိ၏ပစ္စည်းအဖြစ် ပြောင်းလွဲခြင်းဖြစ်လို့ ပြစ်မှုဆိုင်ရာဥပဒေပုဒ်မ ၄၀၃ ကို ကျူးလွန်ရာ ရောက်တယ်လို့ ပြဌာန်းထားတယ်။

A&D Myanmar Legal Services

နောင်ပြင်ရန် ခက်သည့်အမျိုး

မြန်မာတွေအဖို့ အိမ်ထောင်ပြုရတာ အလွန်တရာမှ လွယ်ကူတယ်။ ယောက်ျားနဲ့ မိန်းမ အတူပေါင်းသင်းနေထိုင်တာကို အိမ်နီးနားချင်း ပတ်ဝန်းကျင်က သိရင်ကို လင်မယားအရာမြောက်တယ်။ “အိမ်ထောင်မှု၊ ဘုရားတည်၊ ဆေးမှင်ရည် စုတ်ထိုး၊ ဤသုံးမျိုး ချက်မပိုင်၊ နောင်ပြင်ရန် ခက်သည့်အမျိုး” ဆိုတဲ့ မြန်မာစကားပုံ အရ လင်မယားဖြစ်ပြီးမှ တစ်ယောက်နဲ့ တစ်ယောက် ကွာရှင်းချင်ရင်တော့ အင်မတန်မှ ခက်တယ်။

မြန်မာ့ဓလေ့ထုံးတမ်းဥပဒေအရ လင်မယား ကွာရှင်းဖို့အတွက် အောက်ပါအချက် ၆ ချက်ထဲက တစ်ချက်ချက်နဲ့ ငြိမှ ကွာရှင်းလို့ ရတယ်။
(၁) နှစ်ဦးသဘောတူကွာရှင်းခြင်း
(၂) လင်ဖြစ်သူ ရဟန်းပြုခြင်း
(၃) ရက်စက်မှု ကျူးလွန်ခြင်း
(၄) လင်၏ ဖောက်ပြန်မှု
(၅) စွန့်ပစ်မှု
(၆) လီဆယ်မှု

နှစ်ဦးသဘောတူ ကွာရှင်းတာက ဘာပြသနာမှ မရှိသလို၊ သာသနာ့ဘောင်ထဲ အပြီး ဝင်သွားတဲ့သူနဲ့ ကွာရှင်းရတာလည်း အခက်အခဲ မရှိပါဘူး။ ဒါပေမဲ့ ကျန် (၄) ချက်မှာတော့ တစ်ဦးဦးက မကွာရှင်းပေးလိုရင် ကွာရှင်းခွင့် ရဖို့ ခက်ခဲပါတယ်။ ကွာရှင်းလိုသူက ကွာရှင်းခံရမယ့်လူရဲ့ ရက်စက်မှု ကျူးလွန်ကြောင်း၊ ဖောက်ပြန်တဲ့အကြောင်း၊ စွန့်ပစ်ထားပါတယ်ဆိုတဲ့အကြောင်း၊ လီဆယ်ပြီး စွပ်စွဲပြောဆိုတဲ့အကြောင်းတွေကို ပေါ်လွင်ထင်ရှားအောင် တရားရုံးမှာ လျှောက်ထားရမှာ ဖြစ်ပါတယ်။

A&D Myanmar Legal Services

ရဟန်းဘဝနဲ့ မိဘရဲ့အမွေကို တောင်းပိုင်ခွင့် ရှိမရှိ

မိဘများ ကွယ်လွန်ချိန်မှာ အမွေဆိုတဲ့ ကိစ္စရပ်က ပေါ်ပေါက်လာပြီ။ အဲဒီအချိန်မှာ ကိုယ်က ရဟန်းဘဝနဲ့ ဖြစ်နေတယ်။ ဒီအမွေကို ရဟန်းဝတ်နဲ့ တောင်းပိုင်ခွင့် ရှိသလား။ တကယ်တော့ ရဟန်းဝတ်ဖြင့် အမွေပုံပစ္စည်း စီမံခန့်ခွဲပေးစေလိုမှု စွဲဆိုမယ်ဆိုရင် မြန်မာဓလေ့ထုံးတမ်းဥပဒေနှင့် ညီညွတ်မှု မရှိ။ ထာဝရ ရဟန်းဝတ်ရန် မရည်ရွယ်ဘဲ ဒုလ္လဘရဟန်းဝတ်နေတဲ့ အချိန်မို့လို့ ရဟန်းဘဝဖြင့် အမွေပုံ စီမံခန့်ခွဲပေးစေရန် စွဲဆိုရတာပါဆိုပြီး အကြောင်းပြမယ်ဆိုရင်လည်း သင့်မြတ်မှု မရှိသကဲ့သို့ လက်ခံထိုက်သည်လည်း မဟုတ်ချေ။

ခေတ္တရဟန်းဝတ်ခြင်းဖြစ်တယ် ဆိုရင်လည်း ရဟန်းဘဝဖြင့် ရှိနေစဉ်အတွင်း ဝိနည်းတော်နှင့်အညီသာ ကျင့်ကြံနေထိုင်ရမှာ ဖြစ်တယ်။။ တကယ်လို့ အမှုစွဲဆိုမယ်ဆိုပါက သာသနာ့ဘောင်မှ လူ့ဘောင်သို့ ပြန်လည် ဝင်ရောက်ပြီးမှသာ စွဲဆိုသင့်တယ်။ ရဟန်းတော်နှင့် လူပုဂ္ဂိုလ်တို့ အမွေပစ္စည်းနှင့်စပ်လျဉ်း၍ အမှုဆိုင်ပြိုင်မှု ပြုခြင်းက မြန်မာဓလေ့ထုံးတမ်းဥပဒေနှင့် ကိုက်ညီအပ်စပ်တယ်လို့ မဆိုသာချေ။

A&D Myanmar Legal Services

ခွေးနဲ့တူရင် မိဘအမွေ မရဘူး

သားသမီးတွေ မိဘအမွေ ဆက်ခံခွင့် မရှိတာက ခွေးနဲ့တူတဲ့ သားသမီးဖြစ်မှ ဖြစ်တယ်။ ဥပဒေအရ မိဘတွေအနေနဲ့ သားသမီးကို ခွေးနဲ့တူတယ်လို့ ကြေငြာခွင့် မရှိ။ ဒါကြောင့် သတင်းစာထဲမှာ သား ဒါမှမဟုတ် သမီး ဖြစ်သူကို “ပြောစကား နားမထောင်” လို့ အမွေပြတ် စွန့်လွတ်တယ်ဆိုပြီး ကြေငြာနေတာတွေဟာ တရားမဝင်ပါဘူး။

မြန်မာ့ဓလေ့ထုံးတမ်းဥပဒေအရ သွာနုတ္တ ခေါ် ခွေးနှင့်တူသော သား ဒါမဟုတ် သမီး က အမွေဆက်ခံခွင့်ရှိသူ မဟုတ်။ မိဘတွေအနေနဲ့ သားသမီးတွေကို သွာနုတ္တလို့ သတ်မှတ်ခွင့် မရှိပါ။ အမွေပြတ် စွန့်လွတ်ခွင့် မရှိပါ။ မိဘများ ရှိစဉ်မှာ အမွေဆိုတာ မရှိသလို၊ မိဘများ ကွယ်လွန်ပြီးမှ အမွေဆိုတာ ပေါ်ပေါက်လာတာဖြစ်တယ်။ အမွေဆက်ခံနိုင်စွမ်းကို ပိတ်ပင်နိုင်စေရန် ကြေငြာတဲ့ ကြေငြာချက်ဟာ မြန်မာ့ဓလေ့ထုံးတမ်းဥပဒေနှင့် ဆန့်ကျင်သည့်အတွက် ဖြစ်တယ်။

သွာနုတ္တလို့ မိဘတွေက မသတ်မှတ်နိုင်ရင် ဘယ်သူတွေက သတ်မှတ်နိုင်သလဲ။

သွာနုတ္တသားသမီးများ ဖြစ်မဖြစ်ဆိုတာကို မိဘများကွယ်လွန်ပြီးနောက် အမွေခွဲဝေဖို့ လုပ်တဲ့နေရာမှာ သက်ရှိထင်ရှားကျန်ရှိသည့် ညီအစ်ကို၊ မောင်နှမ၊ ဆွေမျိုးသားချင်းတွေက အဆိုပြုလေ့ရှိကြောင်းကို မြန်မာ့ဓလေ့ထုံးတမ်းဥပဒေနှင့်အညီ ထုံးဖွဲ့ထားသော စီရင်ထုံးများအရ တွေ့ရတယ်။ ပြောရရင်တော့ အဲဒီတစ်ယောက်က မိဘတွေ ရှိစဉ်တုန်းက မိဘတွေကို ဘယ်လို စိတ်ဆင်းရဲအောင် လုပ်တယ်၊ ဘယ်လို ဒုက္ခရောက်အောင် လုပ်တယ်၊ ကိုယ်ထိလက်ရောက် စော်ကားတယ် စသဖြင့် သွာနုတ္တဖြစ်အောင် ပုံဖော်ပြီး အမွေမရအောင် လုပ်ကြတာ ဖြစ်ပါတယ်။

A&D Myanmar Legal Services

သေကြောင်းကြံစည်မှု

သာမန်လူတစ်ယောက်အနေနဲ့ တွေးရင် “ကိုယ်ပိုင်တဲ့ ပစ္စည်း ကိုယ်ဖာသာကိုယ် ဖျက်ဆီးတာ ဘယ်သူ့ ဂရုစိုက်ရမှာလဲ” ဆိုတာ ကိစ္စမရှိပေမဲ့ ကိုယ်ပိုင်တဲ့အသက်ကို ဆက်လက် မပိုင်ဆိုင်လိုတဲ့အတွက် ကိုယ့်ဖာသာကိုယ် ဖျက်ဆီးပစ်တာကတော့ သေသွားခဲ့ရင် ကိစ္စ မရှိဘူး၊ မသေဘဲ အသက်ရှင်နေဦးမယ်ဆိုရင်တော့ ကိစ္စရှိလာပြီ။

မိမိကိုယ်မိမိ သေကြောင်းကြံမှု ကျူးလွန်ရန် အားထုတ်ရင် အားထုတ်တဲ့သူကို တစ်နှစ်ထိ အလုပ်မဲ့ ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ပြစ်ဒဏ်ချမှတ်ခံရနိုင်သည်။

A&D Myanmar Legal Services

ကုန်အမှတ်တံဆိပ်ကို ရုံးမှားပြီး မှတ်ပုံတင်ကြခြင်း

အခုချိန်ထိ လူအများစုဟာ ကုန်အမှတ်တံဆိပ်တွေကို စာချုပ်စာတမ်းမှတ်ပုံတင်ရုံးသို့ သွားပြီး မှတ်ပုံတင်နေကြတာ တွေ့ရတယ်။ စာရွက်စာတမ်းမှတ်ပုံတင်ရုံးကတော့ လိုအပ်တဲ့ အချက်အလက်တွေ ပြည့်စုံတယ်၊ စာရွက်စာတမ်း ပြည့်စုံတယ် ဆိုရင် မှတ်ပုံတင်ပေးလိုက်မှာ ဖြစ်တယ်။ ဒါပေမဲ့ ကိုယ့်ကုန်အမှတ်တံဆိပ်က ဥပဒေအရ အကာအကွယ် ရမှာ မဟုတ်ဘူး။ မှတ်ပုံတင်ထားရဲ့သားနဲ့ ဘာလို့ အကာအကွယ် မရတာလဲ၊ ဒါဆိုရင် ဘာလုပ်ရမလဲ။

ကုန်အမှတ်တံဆိပ်မူပိုင်ခွင့် ဥပဒေကို ၃၀ ရက်၊ ၁လ၊ ၂၀၁၉ ခုနှစ်မှာ ပြဌာန်းခဲ့ပြီး၊ ၁ ရက်၊ ၄ လ၊ ၂၀၂၃ ခုနှစ်တွင် အာဏာသက်ဝင်ခဲ့တယ်။ ဒီဥပဒေအရ ကုန်အမှတ်တံဆိပ်များကို မူပိုင်ခွင့်ဥပဒေအရသာ မှတ်ပုံတင်ရမှာ ဖြစ်တယ်။ သို့မှသာ မိမိတို့ မှတ်ပုံတင်ထားသော ကုန်အမှတ်တံဆိပ်သည် တရားဝင်မှာဖြစ်ပြီး ဥပဒေအရ အကာအကွယ်ကို ရရှိနိုင်မှာ ဖြစ်တယ်။ (စာချုပ်စာတမ်းရုံးမှာ ကုန်အမှတ်တံဆိပ်မူပိုင်ခွင့် မှတ်ပုံတင်ခြင်းသည် ယခုအခါ လုံးဝလုံးဝ ဥပဒေအရ အကာအကွယ် မရတော့ပါ။)

စစချင်းမှာ ကုန်အမှတ်တံဆိပ်မူပိုင်ခွင့်ရုံးက စာချုပ်စာတမ်းရုံးမှာ မှတ်ပုံတင်ထားသော ကုန်အမှတ်တံဆိပ် အဟောင်းများကိုသာ ကာလတစ်ခုအထိ ဦးစားပေး ဆောင်ရွက်ခဲ့ပြီး၊ အသစ်များကို လက်ခံ ဆောင်ရွက်ပေးခဲ့ခြင်း မရှိပါ။ ယခုအခါမှာတော့ အဟောင်းများကို ဦးစားပေး ဆောင်ရွက်သည့် အချိန်ကာလ အပိုင်းအခြား ကုန်ဆုံးခဲ့ပြီး ဖြစ်လို့ အဟောင်းနဲ့ အသစ် ကွဲပြားမှု မရှိတော့ပါ။ ဦးစွာအရင် မှတ်ပုံတင်နိုင်သူသာ ကုန်အမှတ်တံဆိပ်မူပိုင်ခွင့် အခွင့်အရေးကို ရရှိမှာ ဖြစ်ပါတယ်။ ကုန်အမှတ်တံဆိပ်အဟောင်းပိုင်ရှင်များအနေနဲ့ မူပိုင်ခွင့်မှတ်ပုံတင်တာ နောက်ကျလို့ ကိုယ့်ကုန်အမှတ်တံဆိပ်ကို သူများဦးသွားပြီး ယူသုံးသွားလို့ကတော့ ဒုက္ခနဲ့ လှလှ တွေ့ကြရမှာ ဖြစ်တယ်။

A&D Myanmar Legal Services

သွေးဆောင်ဖြားယောင်းမှု

ပြီးခဲ့တဲ့ရက်ပိုင်းက အထက်တန်းကျောင်းသားလေး ကျောင်းသွားပြီး၊ ကျောင်းမရောက်၊ အိမ်ပြန်မရောက်ဘဲ ပျောက်သွားတဲ့ သတင်း အွန်လိုင်းပေါ်မှာ ပျံ့နှံ့ခဲ့တယ်။ ဖတ်မိသူ အပေါင်းလည်း စိတ်ပူကြရတယ်။ နောက်တော့ အိမ်ပြန်ရောက်လာပြီဆိုတဲ့ သတင်း ဖတ်ရတော့မှ စိတ်ပူပေးကြတဲ့သူတွေ စိတ်အေးကြရတော့တယ်။ အဖေဖြစ်သူက ဖုန်းသိမ်းတာကို စိတ်ဆိုးပြီး အိမ်ပေါ်က ဆင်းသွားတာတဲ့။

ဒီအဖြစ်အပျက်ကြောင့် မိဘကို စိတ်ဆိုးပြီး အိမ်ပေါ်က ဆင်းလာတဲ့ ကလေး ကိုယ့်ဆီရောက်လာလို့ လက်ခံထားရင် ပြစ်မှုမြောက်သလား ဆိုတဲ့ မေးခွန်းတွေ မေးလာကြတယ်။ ကလေးမိဘတွေအနေနဲ့ ကလေးလက်ခံထိန်းသိမ်းထားတဲ့ သူကို သွေးဆောင်ဖြားယောင်းမှုနဲ့ တရားစွဲဆိုနိုင်သလား။

အရွယ်မရောက်သေးတဲ့ ကလေးကို မိဘတွေ မသိအောင် ကိုယ့်အိမ်မှာ လက်ခံထားရင် သွေးဆောင်ဖြားယောင်းမှု မြောက်ပါတယ်။ ဒါပေမဲ့ ကလေးက သူ့မိဘတွေကို ကိုယ်က အသိပေး အကြောင်းကြားရင် အန္တရာယ် ရှိတဲ့အရပ်တွေဆီ ထွက်သွားမှာစိုးလို့ အကြောင်းမကြားတဲ့အကြောင်း ပေါ်လွင်အောင် သက်သေပြနိုင်ရင်တော့ သွေးဆောင်ဖြားယောင်းမှု မမြောက်ပါ။

ဥပဒေမှာ ဖော်ပြထားတာကတော့

အသက်ဆယ့်လေးနှစ်အောက် ယောက်ျားကလေးတစ်ဦးဦးကိုဖြစ်စေ၊ အသက်ဆယ့်ရှစ်နှစ်အောက် မိန်းကလေးတစ်ဦးဦးကိုဖြစ်စေ၊ အုပ်ထိန်းသူက သဘောမတူဘဲဆောင်ယူလျှင် သို့မဟုတ် သွေးဆောင်ဖြားယောင်းခြင်းအားဖြင့် ထွက်သွားစေလျှင် ထိုအရွယ်မရောက်သေးသူကို ဥပဒေနှင့်အညီ အုပ်ထိန်းသူထံမှ လူကိုခိုးယူသည်မည်၏ဟု ရာဇသတ်ကြီးတွင်ပြဌာန်းထားပါသည်။

အရွယ်မရောက်သေးသောကလေးသည် လမ်း၌ တရားခံနှင့်တွေ့၍ မိမိအလိုအလျောက် တရားခံနောက်သို့ လိုက်သွားခြင်းသည်လည်း အုပ်ထိန်းသူ၏ အုပ်ထိန်းမှုအောက်မှ အုပ်ထိန်းသူ သဘောမတူဘဲ ဆောင်ယူခြင်းဖြစ်သည်ဟု စီရင်ထုံးများက ဆုံးဖြတ်ထားပါသည်။ သို့သော် အုပ်ထိန်းသူက သဘောတူခွင့်ပြုလျှင်တော့ ပြစ်မှုမမြောက်ပေဟု စီရင်ထုံးများကဆုံးဖြတ်ထားပြန်ပါသည်။

A&D Myanmar Legal Services

Anniversary Day ကို မမေ့ကြနဲ့နော်

ချစ်သူသက်တမ်းနှစ်ပတ်လည်ပွဲ၊ အိမ်ထောင်သက်နှစ်ပတ်လည်ပွဲ၊ မွေးနေ့ပွဲ၊ လုပ်ငန်းနှစ်ပတ်လည်ပွဲ စသည်များကို ကျင်းပသလိုမျိုး မိမိတို့ တည်ထောင်ထားတဲ့ ကုမ္ပဏီကိုလည်း နှစ်စဉ် မွေးနေ့လုပ်ပေးရန် လိုအပ်ပါတယ်။

မိဘရိုးရာများကို ပုံမှန် မလုပ်ဆောင်ဘဲ ပျက်ကွက်ရင် နတ်ကိုင်တယ်ဆိုပြီး ကြားဖူးကြတယ်ဟုတ်။ နတ်ကိုင်ရင်တော့ အနည်းနဲ့အများ စိတ်အနှောင့်အယှက် ကြုံကြရတယ်။ အဲလိုပဲ သူ့ကိုလည်း မွေးနေ့လုပ်နေကြ မလုပ်ပေးရင် နတ်ကိုင် အဲမဟုတ်ပါဘူး သူ စိတ်ဆိုးလိမ့်မယ်နော်။

ဒီတော့ ကုမ္ပဏီတစ်ခုဟာ နှစ်စဉ်နှစ်တိုင်း Annual return မဖြစ်မနေ တင်ကြရမှာ ဖြစ်တယ်

မတင်ဖြစ်ရင်တော့ ကုမ္ပဏီဟာ

Suspend

Struck off

အခုနောက်ပိုင်းဆိုရင်

အခွန်မဆောင်တဲ့ ကိစ္စတွေနဲ့ ပေါင်းပြီး Black List ပါ အသွင်းခံရတတ်ပါတယ်။

A&D Myanmar Legal Services

Company Suspended & Struck Off

၂၀၁၇ ခုနှစ် မြန်မာနိုင်ငံကုမ္ပဏီများ ဥပဒေပါပြဋ္ဌာန်းချက်များနှင့်အညီ အီလက်ထရောနစ် မှတ်ပုံတင်စနစ် MyCO တွင် ၁.၈.၂၀၁၈ မှ ၁၅.၁.၂၀၂၀ ရက်နေ့ထိ မှတ်ပုံတင်ခဲ့သည့် ကုမ္ပဏီ စုစုပေါင်း ၆၇,၃၆၇ တွင် ကုမ္ပဏီ ၇,၆၃၇ သည် ဆိုင်းငံ့ (Suspended) အခြေအနေတွင် ရောက်ရှိ နေပါသည်။ သို့ဖြစ်ပါ၍ မိမိကုန်မ္ပဏီ၏ Company Status တွင် Suspended ဖြစ်/မဖြစ်ကို အမြန်ဆုံး စစ်ဆေးပြီး ဥပဒေပြဋ္ဌာန်းချက်များနှင့် အညီ ဆက်လက်ဆောင်ရွက်နိုင်ပါရန် အသိပေး အပ်ပါသည်။

အဆိုပါဆိုင်းငံ့ ကုမ္ပဏီများအား မြန်မာနိုင်ငံကုမ္ပဏီများ ဥပဒေ ပုဒ်မ ၄၃၀ (စ) အရ MyCO တွင် ဆိုင်းငံ့စာရင်း (Suspended) စတင်ဖော်ပြခံရသည့် နေ့မှ ၆ လ အတွင်း နှစ်စဉ်အစီရင်ခံစာ (Annual Return) မတင်ပြပါက System မှ Company Status တွင် မှတ်ပုံတင်စာရင်းမှ ပယ်ဖျက်ခြင်း (Struck Off) အဖြစ် ပြောင်းလဲဖော်ပြသွားမည်ဖြစ်ပါကြောင်း Dica မှအသိပေးကြေညာထားပါသည်။

ကုမ္ပဏီတစ်ခုသည် suspend သို့မဟုတ် struck off ဖြစ်နေပါက ထိုကုမ္ပဏီတွင်ပါဝင်သော ဒါရိုက်တာများသည် အခြားကုမ္ပဏီအသစ်တည်ထောင်လို့မရပါ။

A&D Myanmar Legal Services